Woh ek sawal...

woh sirf sawal nahi tha esa laga maano wo mujhse meri zindagi ke tajurbe me se ek hissa maang rahi ho,

"Appi, dil tootna kya hota hai?"

Uss waqt kehna bhot kuch tha par samajh hi naa aaya, bolne ke liye ek alfaaz bhi na aaya, phir mai sochne par majboor hoti chali gayi....

Dil tootna kya hota hai ye uss maa se pucho jisne ye kehkar khana nahi khaya ki usey bhook nahi hai taki uske bachchon ka pet bhar sakey, ye un budhe maa baap se pucho jinhone vruddhaashram me dum todd diya aakhiri saans bhi iss ummeed par lekar ki unka beta unhe lene zaroor aaega, ye uss walid se pucho jo apni beti ke liye dahej na juta paya aur usne apni beti ko sasural me taaney sunte paya, ya uss aulad se pucho jisne apne pita ko aiyyashiyan karte dekha ho or maa ko sabr se muskurate dekha ho...

Ye uss bete se pucho jisne maa ke aanchal se aansu ponchne ki umr mei maa ki qabr ke paas bethkar aansu ponche ho, jisne naadaniyon ki umr mei zimmedariyon ko sambhala ho, jisne apne sapne qurbaan kar apno ki khwahishon ko muqqammal kia ho..

Ye uss patni se pucho jiska pati nahi balki uske khoon se lipti hui wardi sarhad se wapas lauti ho,

Ye uss aashiq se pucho jisey uski mohhabbat ye kehkar chorr gyi ki paise ke bina koi tumhara nahi,ya us mehbooba se pucho jisey uski mohhabbat ne tohfe me ghadi to di ho par waqt nahi, jisne ki ho kabhi uski qadr nahi,
Ye us raqeeb se pucho jo apne pyar ka izhar kar na paaya or phir uski mohhabbat ko kisi aur ka hath thame paaya,
Ye un ishaqzaado se pucho jinhe muashrey ne ye kehkar thukraya ho ki humari qaum ek nahi, 
Ye uss ladki se pucho jisey chaar logon ne kaala, badsurat keh kar neecha dikhaya ho,
Ye taqdeer se haare uss shaks se pucho jo sajdey me fir jhuk na paaya ho, jisne mandir ki orr fir apna rukh na paaya ho,

Ye duniya ke har uss insaan se pucho jisne laakhon ki bheed me khud ko tanha paaya ho, jisne apne hi apno se kai baar dhoka khaya ho, kai baar dhoka khaya ho.....

So..to all the people out there kabhi kisi ka dil na todein wo sirf ek hota hai aur wo bhi kaanch sa nazuk beshaq daant todein, haddiyan todein, aur kuch zyada hi dushmani ho to uska phone todd dein...hahaha...and to my dearest younger sister, shayad tumhe jawab mil gaya ho and i wish kabhi dil tootne ke maayne tumhe zindagi se na seekhna padein.

love 
your's Appi :)